مستنياك
للشاعرة عبير عبد السلام :
أنا استنيت كتير بَعدك
وقلبي وجعني من بُعدك
وبتمناك يا ريت ترجع
تنفذ لينا يوم وعدك
حياتي واقفة من غيرك
ولا هرضى بناس غيرك
يوماتي انا بدعي واستناك
واقول ارجع يدوم خيرك
وبعمل كل يوم قهوة
وفنجانك بــ يستناك
وبتخيل كأنك جيت
واقول أخرتها أيه وياك
بجد نسيتني بالساهل ؟!
ولا عونتش ف يوم ألقاك
طب ازاي بس هتحمل
ونار الوحدة ليا هلاك
وقولي ازاي هتقدر يوم
تعيش من غيري وأنت هناك
نسيت ان احنا روح واحدة
ومش واخدين على الوحدة
ولو نبعد هيبقى دا موت
وعادي يا روحي روحي فداك
بوكيه الورد صارله يومين
بيبكي بدمع عينه حزين
ومستني لقاك عطشان
وصابر حتى لو لسنين
وعطرى اللي انت بتحبه
بحطه كل يوم بالليل
واشم روايحك الحلوة
تنسيني العذاب والويل
على أمل ان قلبك داب
ورق لحالي يوم يا جميل
واقول راجع خلاص بكرة
وا لاقي الفرح ليا سبيل
يا ريت ما تخيبوش ظني
عشان مابقاش خلاص فيه حيل
أناهد في الوجع والآاااه
ودمعي اللي بينزل سيل.